Nel 50° della Guerra 1915-1918, Telve, luglio 1968
SIC TRANSEAT GLORIA MUNDI
Scusema sior Campestrin
se la en tono per latin.
Quando me dà l’estro
fò come ti co ti canti vespro.
Non so perché e per quale idea
de sto fregaterum cioé de sta asemblea
non so lo scopo de sta riunion
ghelo in vista la Pension?
Quando che sta matina
i sonava in S. Giustina
i telvati i se domandava
perché e per cosa i sonava.
Alquanti zoveni i se la rideva
e fra lori i se diseva:
“Varda i veci i va ala leva
se vede, i è proprio rimbambiti
i crede d’esser ancora coscriti”.
En piaza ghera do vece
le ho sentue co le me rece:
“Comare, giosumaria, cosa farai,
ghe tochelo endar soldai?”
Bando alle ciacere: niente commenti
noi semo degli ex combatenti
(e qua per nesuno n’é un mistero)
combatendo avemo perso l’impero.
Noi avon continuà la strada
per quanto ben che la vada
la sarà corta, ste sicuri
vedé ben che sem maduri.
“Sic transeat gloria mundi”
de quei doveni forti e rubicondi
boria e vanto de Ceco Bepe
semo ridoti a quatro s’cepe.
De quei “Lander Zizen” famosi
eco doe tre veci comatosi
e de quai Kaiser Jeger Tirolesi
alquanto veci, storti e obesi.
Fior fior dele Austriache armate
semo qua pieni de catarate
de reumi, tose e altri guai
la ghe vol tuta a far “Kertai”.
Nesuno crede che si ofenda
ma l’età, quale nemesi tremenda,
nonostante la sana vita agreste
la ne ha conzà proprio dale feste.
“Ghevere eraus”! Fora i s’ciopi!
con cataplasmi e con siropi
per quanto ben che i ne fae
endemo for de “doplerae”.
“Faihl far nider auf e svorolinie”.
come fevane for per le Volinie
con po’ de brodo de carote
“Lausserit” de di de note.
“Folle ristung miten gevere”
ve recordé che brute tere?
Quanto fredo e che strapazi
su e do per quei Carpazi.
Do te la palta fin ai denoci
sporchi e pieni de pioci
con bon rispeto parlando,
n’apetito da far invidia al Nando.
E’!!! a servir l’Austria e l’Ungheria
aven fato na grande feseria
(a sto mondo tuti se sbaglia)
ma anche quei che ha servì l’Italgia.
Ke par che i era stati [illeggibile]
e i ha fato pochi avanzi
Alpini o Fanti quando le ghe toca
tuti lo stes, i ghe na na gnoca.
Però noi trentini n’aven pasà tante!
“Italiener” “facfulter” “fardante”
l’ufiziale austriaco stava sula “soa”
là, ghera poco da menar la coa.
“Come color a Dio nemici e nemici
sui” (Dante inferno)
bisognava criar sempre Ciufufui
anca cola pel tirada e la panza voda:
i canederli i era for de moda.
Dal disdoto, a forza de dai
finalmente i ne ha liberai
dopo aspri e longhi combatimenti
“I fratelli d’Italia ci han redenti”.
Ma a Isernia, provincia de Campobasso
tanti i ha calà zo el graso
no portava proprio la spesa
serarli tre mesi te na cesa.
De Roma i ordini i era quei,
però che raza de fradei
Perfeto, candido, Bepi, Pepito
smentime mo’ de quel che ho dito.
Lo pol dir de pu de un
i todeschi i ne diseva “Tum”
tum voleva dir “baùco”
e i talgiani i ne diseva “cruco”.
I Tedeschi “lude und ferdante”
i talgiani “porco d’un austriacante”.
Dagli uni eravamo odiati
dagli altri disprezati.
La doventù no pol capir
quel che aven dovù sofrir
no i ne calcola per niente
i ne ride fora arente!
Noi che sfidavan perfin i Cosachi
adeso ciapemo dei macachi
eravami, i dis, dei lavativi,
l’é per questo che semo vivi.
No! Noi sen vivi per testimoniar
che la smania de dominar
con la superbia, l’orgoglio e presunzion
rovina famiglie, paese e Nazion
Ex Combatenti del disdoto
Auf! in man quel goto
e criaron finché gavon vita:
“Viva l’Europa unita!”.
Sic transeat gloria Mundi,
con alquanti deprofundi
e da quel ten, ten, che val en zero
“Wir nach” verso el viazo del Perero (cimitero)
E “salutar a tuti quanti”.
Stop no vao pu avanti
Ferrai Luigi
 |
 |
 |
|---|
stampa la pagina
invia a un amico